وماذا بعد التخرج

أقر واعترف وانا فى غير قواى العقلية بأننى قررت ان اكتب اليكم
منذ زمن ليس ببعيد كان الطالب فى الجامعة بيقول لنفسه : امتى بقى نخلص من هم وقرف المذاكرة والامتحانات ؟
وكنا بنحلم بالتخرج والوظيفة الابهة والوضع الاجتماعى والعبط اياه وخلافه,
وذلك باعتبارنا خريجوا كلية التجارة قسم المحاسبة وان مافيش مصلحة
بتمشى من غير الحسابات وان سوق العمل بيتلهف علينا ويسعى لتعييننا فور التخلف .. عفوا اقصد التخرج
وذلك طبعا زى ما قالولنا الدكاترة الافاضل ربنا يسامحهم ويديهم على اد نيتهم..
ولكن الحقيقة المرة والواقع المؤلم يقولان غير ذلك وانه لا توجد فرص عمل ولا حتى خرم ابرة للخريجين من الشباب .
وذلك لاختناق سوق العمل نتيجة قانون المصمصة اياه بتاع شركات القطاع الخاص وخروج جيش من الموظفين واصحاب الخبرة , حيث ان سنوات خبرة الواحد منهم لا تقل عن عدد سنوات الخريج الجديد ..
وكم تلقيت عروض عمل من الاقارب والمعارف قبل التخرج وان كل منهم سوف يعمل على تعيينى فى شركته وان الاخر سوف يجعلنى اعمل فى المكتب المجاور له ... وكلا بكش من ده كتيير ..
وكم كانت الاعذار منهم ايضا على حالة " ان الشركات اتباعت والموظفين فى الشارع , وان الكتب المجاور تحول الى حمام ..!!
وبالتالى كان على ان اكافح بنفسى وابدأ رحلة العذاب والضنا والبحث عن وظيفة ..
وعليه بدأت البحث عن طريق الاعلانات المعلبة وما ادراك ما الاعلانات المعلبة .. خيبة منيله ..
معلش طولت عليكوا فى المقدمةونبدأ فى الرحلة بس بعد ماروح اشرب كوباية مية عشان ريقى نشف

لاولى " اعلان 1 " :
ــــــــــــــــــــــــــــــــــــــــــــــــــ

( الى كل من الشباب والشابات , الطلبة والمتخرجين, المتجوزين والمطلقين , الارامل واصحاب العاهات : نطلب عارضين وعارضات لمعرض
الكتاب المحلى بدخل مغرى جدا.. وامتيازات كتير اوى جدا...." التأمين الصحى. معاش السادات . مدافن الصدقة "
اتصل بنا الان فمعنا 13 يوم تساوى 500 جنيه )

وفورا اتصلت واخذت العنوان وركبت ترام مدينة نصر ذلك الاختراع العبقرى ( ومن باب العشم بالشئ يجرى حاليا التشاورحول مشروع تحديث الترام ولكن نظرا للصراع الدائر بين وزارة النقل والمواصلات وبين هيئة الاثار تقرر تشكيل عدة لجان منبثقة من الجهات المختصة والغير مختصة لانتداب خبير اجنبى )..

وفور وصولى لمقر الشركة فوجئت باعداد كبيرة جدا من الشباب وعلى كل لون يا باتسطة ومن اول ابن البواب وحتى ابن وكيل الوزارة
واللى جاى بالجلابية والشبشب واللى جاى بالعربية بى ام كارو , واخرى اسرعت بمريلة المطبخ ..وهكذا

وبعد المقابلة الشخصية والكشف الطبى وبيان الموقف من التجنيد وتقرير الطبيب الشرعى والخضوع لجهاز كشف الكذب والبحث فى صحيفة الجنايات تمت
وللعجب الموافقة على الجميع وفقا لمبدأ العدالة الاجتماعية ..!!

وتم تقسيمنا على مجموعات ولكل مجموعة قائد لتدريب باقى المجموعة
وكان قائد مجموعتى بلا فخر الكابتن تاتو او مستر / تامر سبللو ..
حاجة كده اخر روشنة البادى .. والجينز .. واللبانة" وماتقلش لعدوك على تسريحة شعره حاجة كده على الموضة ..

وعليها راحيين جايين نعمل دعاية وعقود لمنتجات الشركة لاكثر من شهر لما طفحنا الدم وجبنا جاز حتى جاء موعد المعرض واكتشفنا ان الشركة المحترمة ما هى الا شركة وهمية للنصب على المغفلين وان منتجاتها مضروبة وايضا لم ولن تشترك فى اى معارض ولا يحزنون وانما تم استغلالناكمندوبين دعاية ومبيعات بدون اجر ..
وان صورة البيه المدير واعضاء شركته اللى معروضة فى مدخل الشركة ما هى
الا صورته ايام زمان لما كان فى الكشافة ...

وطبعا كل منا راح لحال سبيله وقفاه يقمر عيش لعدم وجود دليل على صحة
هذه الاحداث ... وحسبى الله ونعم الوكيل

ملحوسة صغيرة:
ــــــــــــــــــــــــــــ


الاعلان يتكرر بمعدل مرة شهريا لطلب عارضين وعارضات لمعرض الطفل ومعرض التكنولوجيا وعيد الفلاح والعيد القومى لجمهورية ساحل العاج .... الخ .
وذلك عن طريق عدة شركات تعمل وتربح بهذه الطريقة ذات التفكير العفن.. تابعونا



المحنة الثانية " اعلان 2
ــــــــــــــــــــــــــــــــــــــــــــــــــ ــ


( جريدة محترمة جدا تطلب محاسبين , محررين سكرتارية , عمال نظافة ,عمال مناجم , مهندس بترول , اطباء نساء وتوليد ...... الخ
اتصل فورا والا فاتك نص عمرك .
العنوان : عشرومية شارع الملف الزراعى .. العجوزة .. ت: .... )

وطبعا اخذت نسخة من 9000000 نسخة الخاصة بمؤهلى وطلعت اجرى على
الجريدة المحترمة.

وكان مقرها عبارة عن شقة معفنة " , قلت وماله اجرب حظى..

ودخلت لاجد السكرتير الوسيم الاستاذ / شفطورة ابو ضب .. يبتسم لى ابتسامة صفراء وفى ايده استمارة طلب وظيفة تقدم للمعلم رئيس التحرير
الاستاذ / منجاوى العيسوى

وملئت الاستمارة وفى اثناء جلوسى سمعت وبالصفة البحتة طراطيش كلام من موظفة سابقة فيما معناه ان الجريدة بتعين طقم موظفين جديد كل شهر

يعنى
الكل بيشتغل لمدة شهر من غير مرتب وطبعا بيتم تسريحه لظروف العمل والطقس .. ثم اعلان جديد وطقم جديد .. وهكذا .......


يا واقعة طين ... قلتها لنفسى واخذت ورقى ويا فكيــــــــــك..



واخيرا جربت حظى لاخر مرة مع الاعلانات المغلفة اياها

وكان الاعلان بيقول....
.

بس معلش اروح اشرب كوباية شاى وارجعلكوا تانى

تابعوناااااااااااااااااا

المحنة الثالثة " اعلان 3 " :-
ــــــــــــــــــــــــــــــــــــــــــــــــــ


( تعلن شركة اولاد القرش للاستيراد والتعجيز عن طلب بشموحاسبين بكابورتوس تجارة ... ت .... العنوان .... وسط البلد )..

وذهبت والحاجة تدعو لى بالتوفيق
ولاننا فى عصر السرعة ركبت مترو الانفاق .. وبعد اللف والدوران وخير اللهم اجعله خير وجدتنى امام باب الشركة التى كان شعارها " نحن لا
نزرع الشوك "..

ودخلت برجلى الشمين وطلبت من السكرتيرة الموقرة الاستمارة لتعطينى اياها بحذر شديد من اسفل درج الكتب وهى بتتلفت شمال ويمين
بحجة انها احتياطات امنية لان الشركة لها اعداء ومنافسين وثأر بايت والذى منه ....

وملئت الاستمارة بالبيانات المعتادة والغير معتادة والتى تختبر معلومات وقدرات الموظف , على غرار :
1- ما هو عدد اصابع رجل الصرصار .....
2- ماهو مذكر كل من نحلة ونملة ؟ وجمع كل من فجل وجرجير ؟
3- ما هو اسم فراش مكتب وزير الدفاع الاسرائيلى ..؟
4- ما هو عدد سكان كوكب زحل ؟ مع ذكر اسماء اسر ضحايا الحرب العالمية الثانية ؟

اما شروط الالتحاق بالعمل فهى كالاتى :
1- العمل من الساعة 7 صباحا حتى الساعة 6 من صباح اليوم التالى
2- ممنوع منعا باتا الاكل اوالشرب فى غير المواعيد المحددة لذلك
وهى من الساعة 3 وختى الساعة 3.5
3- ممنوع مضغ اللبان وتسريح الشعر اثناء العمل
4- لا يسمح بدخول الحمام الا مرة واحدة اسبوعيا وذلك بعد تقديم طلب
مرفق عليه
الدمغة وعرضه على اللجنة المختصة .
5- تمنح الشركة للعمال اجازة اسبوعية لمدة نص ساعة , واخرى سنوية
لمدة 3 ايام مع الشغل والنفاذ
6- اى موظف يعترض على الشروط السابقة او يخالفها يعاقب بالاعدام شنقا رميا بالرصاص .

ورغم هذه الشروط المتعسفة وافقت وقلت يا واد وماله اكيد المرتب
كبيييييييييييييير اويييييييييييييى......

وفجأة ... صرخت فى السكرتيرة
معلنة بأن اجلى ..اقصد دورى فى المقابلة قد حان , ووجدت سهم يشير الى مكتب المدير .

وفتحت الباب لاجد سلم .. صعدت السلم فوجدت باب .. فتحت الباب الثانى لاجد نفق .. مشيت فى النفق لاجد سلم .. نزلت السلم .. فوجدت باب
فتحته لاجد سرداب .. واخيرا وجدت باب المدير فتحته لافاجأ بنفسى فى
الشارع وامام باب الشركة ..!!!!!!!!
وهنا جاءت السكرتيرة واخذتنى للداخل وقامت بازالة غطاء بالوعة المجارى
ونزلت السلم لاجد مكتب المدير " مبررة كل ذلك بأنه مجرد احتياطات امنية والذى منه " ...

وكان مكتب المدير عبارة عن غرفة مظلمة
وبدأ المدير " اصلع بأنف معقوف وشكله عامل زى جرهام ابو سونيا " يسأل بطرقة وكلاء النيابة فى التحقيقات السياسية :
- هل لك اى اتجاهات سياسية..؟ امتى وفين وازاى ولماذا..؟
وقبل
ان ابدأ فى الاجابة بدأ يسأل عما اذا كنت باكل الفول بالليمون ولا بالتقلية .... وهكذا ..

واخيرا وافق الباشا المدير على تعيينى بمرتب كبير جدا يعبر عن مدى كرمه وكرم الشركات القطاع الخاص وهو 120 ملطوش " شوفتوا الكرم الزائد يا سادة "..

واخيرا .. وفى رحلة عودتى للمنزل قررت ركوب الاتوبيس العام طبعا للتوفير وعلى مافتكر وزى ما قال اولاد الحلال اللى تطوعوا بتوصيلى
للمنزل ( وصلت بعد 7 ايام نظرا لارتباك حركة المرور لمرور موكب عين اعيان البلد وواحد من الناس المهمين ) واللى قالوا للحاجة والسيد الوالد انى كنت واقف فى ميدان عام شعرى منكوش وهدومى مقطعة انظم شارات المرور وبزعق واقول (( يسقط المطر فى الشتاء .. ويعيش السمك فى الماء ))..
وسلملى على غفير القوى النايمة
والعشروميت فرصة عمل

ملحوسة صغيرة

لقد قررت العمل كطبيب اسنان خاصة بعد ازدهار قانون الخلع واللى بيعيش ازهى عصوره



منقوله

ههههههههههههه

اى خدمه

الحقيقه انا مش عارفه اقول ايه

اضحك ولا اعيط بجد حال البلد يبكى

ول يبحصل لنيا ده ظلم كبير

يلا حسبى الله ونعم الوكيل

بجد موضوع أكتر من رائع يامستر فيرس


تحيااااتى

شكرا ليكى يا عصفورة الجنه